ဂျကာတာ အမှတ်တရ

အခုနောက်ပိုင်း ကျမက အလုပ်ဝင်နေပြီး အလုပ်ကလည်း စနေနေ့တစ်ဝက်ထိဆင်းရတယ်။ အလုပ်ပိတ်ရက်က တစ်ပတ်မှာ တစ်ရက်ခွဲရတယ်ဆိုပေမယ့် စနေနေ့ဝက်အလုပ်ပြန်လာလို့ အိမ်ရောက်ရင် နေ့လည် ၃ နာရီလောက်ဖြစ်သွားပြီ။ ဒီလိုဖြစ်နေတော့ တစ်ပတ်စာအိမ်အလုပ်တွေကို အဲ့ဒီ နှစ်ရက်မှာ သိမ်းကြုံးလုပ်နေတတ်တော့ သူ (ချစ်ခင်ပွန်း) က ပြောလာတယ်။ အလုပ်ပိတ်ရက်ကို တစ်ချိန်လုံး ဘာတွေလုပ်နေမှန်းမသိဘူး၊ အငြိမ်လည်းတစ်စက်မှ မနေဘူး။ အေးအေးဆေးဆေးနေတဲ့လေ။ ကျမကလည်း အင်းပါ ဒါလေးလုပ်လိုက်ဦးမယ် ဟိုဟာလေးလုပ်လိုက်ဦးမယ် ခဏလေးပဲဆိုပြီး ခဏလေးတွေပေါင်းသွားပြန်တယ်။
.
ကျမအလုပ်မဝင်ခင်ကဆို weekend သူအလုပ်ပိတ်ရက်မှာ အပြင်ကို အတူထွက်လည်ရမှာကို မျှော်နေတတ်ပေမယ့် အခုကျ သူက အပြင်ထွက်ဖို့ပြောရရင်တောင် ကျမက တစ်ခါတစ်ခါ စိတ်မပါသလို မသွားချင်သလိုဖြစ်ပြီး အိမ်ကိစ္စတွေပဲ လျှောက်လုပ်နေတတ်တော့တာလေ။
.
ဒါနဲ့ပဲ Public Holiday ကို စနေ ဒါမှမဟုတ် တနင်္ဂနွေ ဒါမှမဟုတ် တနင်္လာနေ့ ကျမှ ကျမအလုပ် ၂-၃ ရက်ဆက်ပိတ်ရင် ခရီးတိုတစ်ခုသွားဖို့ စဉ်းစားနေလေ့ရှိတယ်။
.
စနေနဲ့ public holiday တိုက်ဆိုင်သွားတာနဲ့ နှစ်ရက်ခရီးတိုသွားဖို့ မရောက်ဖူးသေးတဲ့ Jakarta ကို သွားကြဖို့ စဉ်းစားပြီး လေယာဉ်လက်မှတ်ဝယ်လိုက်တယ်။
ဂျကာတာက အထင်ကရနေရာတွေကို ထုံးစံအတိုင်း အွန်လိုင်းမှာရှာ။ ပြီးတော့ ဂျကာတာက သူ့သူငယ်ချင်းတချို့ကို ဒေသအကြောင်းမေးပြီး Jakarta Central မှာ တစ်ညအိပ်ပဲနေမယ့် ဟိုတယ်ကို စိတ်ကြိုက်ရွေး booking လုပ်လိုက်တာပေါ့။
သူ့သူငယ်ချင်းတွေကလည်း ဂျကာတာရဲ့ အားနည်းချက် အားသာချက်တချို့ကိုပြောပြပါတယ်။
.
ဒီလိုနဲ့ သွားမယ့်ရက်ကျတော့ ဖူးခက်သွားတုန်းကလို အချိန်ကပ်မှ လေယာဉ်ပေါ်ရောက်တာမျိုးမဖြစ်ရလေအောင် ခပ်စောစောသွား၊ breakfast စားပြီး လေယာဉ်ပေါ်စောစောရောက်သွားတယ်။ နှစ်ရက်တည်းခရီးမို့ အဝတ်အစားအပိုတစ်စုံစီပဲပါတော့ ကျောပိုးအိတ်တစ်လုံးရယ် ဘေးလွယ်အိတ်တစ်လုံးရယ်နဲ့ ပေါ့ပေါ့ပါးပါးရှိလှတယ်။
မနက်အစောကြီးကတည်းက မိုးရွာနေခဲ့တော့ လေယာဉ်စတက်ချိန်မှာ ရာသီဥတုက ကြည်ပေမယ့် ကောင်းကင်ထဲမှာ မိုးသားတိမ်မဲမဲတွေကြားမောင်းနေရတဲ့အတွက် လေယာဉ်က ခါပြီးမငြိမ်တာကိုလည်း ကြုံဖူးလိုက်ရတယ်။
.
ဂျကာတာလေဆိပ်ကနေ ကျမတို့သွားမယ့် ဂျကာတာအလယ်ပိုင်းကိုရောက်ဖို့ တက္ကစီဆို ၄၅ မိနစ်လောက်စီးရပြီး ဘတ်စ်ဆို ၂နာရီ နီးပါးလောက်ကြာမယ်ဆိုတာ သိထားရပေမယ့် ဘတ်စ်စီးရင် ဒေသန္တရဗဟုသုတ ပိုမြင်နိုင်တာကြောင့် ဘတ်စ်နဲ့ပဲ သွားလိုက်ကြတယ်။ Terminal တစ်ခုနဲ့တစ်ခု အလှမ်းဝေးတဲ့ လေဆိပ်ထဲမှာပင် ဘတ်စ်က နာရီဝက်လောက်ကြာသွားတယ်။ စုစုပေါင်း တစ်နာရီခွဲလောက် ဘတ်စ်စီးပြီးချိန်မှာ Gambir Station ကိုရောက်တယ်။
.
လမ်းတလျှောက်မှာ ကားတွေပေါများလှသလို ခုံးကျော်ကားလမ်းမကြီးတွေ များပြားလှပြီး ဗလီတွေအများကြီးကိုလည်း တွေ့ရတယ်။
Gambir Station ကို ရောက်တာနဲ့ ဟိုတယ်ကိုမသွားသေးပဲ မြို့ထဲတစ်ဝိုက် လျှောက်လည်ကြည့်တယ်။ လေဆိပ်မှာဝယ်လာတဲ့ ဖုန်းကတ်ကို Data on ထားပြီး သွားမယ့်နေရာကို Map မှာ Direction ကြည့်ပြီးသွားတယ်။

မြို့လယ် ပန်းခြံကြီးထဲက ကျောက်တိုင်ကြီးဘက်ဝင်ကြည့်ဖို့ ဝင်ပေါက်ရှာရင်း ဆိုင်တန်းတွေ့တော့ ဗိုက်ဆာလာတာနဲ့ နေ့လည်စာဝင်စားပြီး ကျောက်တိုင်ဆီအရောကိချီတက်တယ်။ အဝေးကကြည့်တော့ သာမန်ပဲ ထင်ခဲ့ပေမယ့် အနီးကပ်လာလေ လူတွေကို အပေါ်မှာလှမ်းမြင်ရလေဖြစ်တော့ ကျမတို့လည်းတက်ကြည့်ဖို့စဉ်းစားလိုက်တယ်။
ကျောက်တိုင်အောက်ခြေရောက်တော့ အထဲကိုဝင်ဖို့ လက်မှတ်ဝယ်ရတယ်။ ကျောက်တိုင်ဒုတိယထပ်ထိတက်မယ့်လက်မှတ်နဲ့ ထိပ်ဆုံးထိလက်မှတ် ရွေးချယ်လို့ရတော့ ကျမတို့က ထိပ်ဆုံးထိလက်မှတ်ဝယ်ပြီး အပေါ်တက်ဖို့အတွက် တစ်နာရီခွဲနီးပါးလောက် တန်းစီစောင့်လိုက်ရတယ်။ ကျောက်တိုင်ကြီးရဲ့အောက် Underground မှာတော့ Museum ကြီးရှိပြီး ဂျကာတာရဲ့သမိုင်းကြောင်းတွေကို ပန်းချီပန်းပုတွေနဲ့ စနစ်တကျသေသပ်စွာ ရှိနေတာကို အံ့သြစွာတွေ့ရတယ်။
.
အဲ့ဒီက ထွက်လာတော့ ညနေစောင်းနေပြီမို့ ဟိုတယ်ခဏပြန်နားဖို့ လမ်းလျှောက်လာတုန်း မိုးရွာလာတာနဲ့ တုတ်တုတ်ငှါးပြီး သွားလိုက်ရတယ်။ ဂျကာတာမှာ အခက်အခဲတွေ့ရတာက ဘာသာစကားပါပဲ။ သူတို့ပြောတာလည်း ကိုယ်နားမလည် eng လိုလည်း သူတို့နားမလည်တော့ တစ်ခုခုဆို သူတို့က ကျသင့်တဲ့ပိုက်ဆံကို ထုတ်ပြတယ်။ အဲ့ဒီတော့မှ အဆင်ပြေတယ်။ သွားချင်တဲ့နေရာမေးရင်လည်း ကိုယ်တွေမေးတာက အင်္ဂလိပ်လိုနာမည် သူတို့သိတာက အင်ဒိုနာမည်ဖြစ်နေတော့ ကိုယ်သွားချင်တဲ့နေရာကို map ပြပြီးမေးလည်း သူတို့အများစု လုံးဝမညွှန်းပေးတတ်ကြဘူး။
.
ဒီလိုနဲ့ ဟိုတယ်ရောက်တော့ ဖုန်းတွေအားသွင်းမယ်လုပ်တော့ plug တွေက လုံးဝအဆင်မပြေဘူး။ ကိုယ်တွေ Plug က 3pin, ဟိုတယ်မှာက 2 Pin ဆိုတာဖူးခက်သွားတုန်းက ကြုံဖူးပြီမို့ အဲ့တုန်းက ဝယ်ထားတဲ့ 2 Pin Extension Plug ယူသွားပေမယ့် ဂျကာတာက plugs တွေအားလုံးက 2 pin အလုံးတွေမှာမှ ခေါင်းတွေကလည်း အဝိုင်းတွေဖြစ်နေပြီး လေးထောင့် plus ဘယ်လိုမှတပ်မရဘူး။ Reception ကို မေးကြည့်တော့လည်း သူတို့မှာ extension မရှိဘူးတဲ့။ ဒါနဲ့ပဲ ယူသွားတဲ့ Power Bank ကို အားသွင်းပေးထားဖို့ ပြောလိုက်ရတယ်။
.
ခဏနားရင်း အိပ်ပျော်သွားတော့ နိုးတဲ့အချိန်မှာ ညဘက်ဖြစ်နေပြီ။ ဒါနဲ့ မြို့လည်ဘက် လမ်းလျှောက်ရင်း Skye Bar ၅၆ ထပ်မှာ ညစာစားရင်း ဂျကာတာညရှုခင်းကိုကြည့်ဖို့ သွားပေမယ့် မိုးရွာထားတော့ အပြင်ကို ကောင်းကောင်းမမြင်ခဲ့ရဘူး။
Google Map သုံးပြီး လမ်းလျှောက်လာရင်း Skype ရှိရာ BCA Tower မရောက်ခင်လမ်းဆုံမှာ ကားတွေပိတ်ကြပ်နေပြီး လူကူးလမ်းမတွေ့တာနဲ့ အနားမှာရှိနေတဲ့ ယာဉ်ထိန်းရဲကိုမေးတော့ ဒီကနေပဲဒီအတိုင်းကူးသွားဆိုတာကြောင့် ၁၅ မိနစ်နီးပါးစောင့်ပြီးမှ ကားတွေကြားထဲတိုးပြီး လမ်းကူးလိုက်ရတယ်။
.
နောက်တစ်ရက်မနက်စောစောမှာ ဟိုတယ်က breakfast စားပြီးတော့ တစ်နေကုန်လည်ပြီးတာနဲ့ ညနေဘက်မှာ Airport တန်းဆင်းမယ်လို့ စိတ်ကူးပြီး တစ်ခါတည်း checkout လုပ်ပြီး ထွက်လာလိုက်တယ်။
ပထမဆုံး Istiqlal Mosque ကိုရောက်ခဲ့တယ်။ ဝင်ဝင်ချင်းမှာပဲ မေးလိုက်တော့ ကျမတို့ကို ဧည့်သည်လားဆိုပြီး Information Counter ကိုခေါ်သွားပေးတယ်။ အဲ့ဒီက တာဝန်ရှိမိန်းကလေးတစ်ယောက်က Guest room ဆီခေါ်သွားပြီး ဖိနပ်ထားဖို့ပြတယ်။ ပြီးတော့ ဧည့်မှတ်တမ်းမှာ ဖြည့်ပေးရတယ်။ ဖြည့်နေရင်းကြည့်လိုက်မိတာ တစ်ခြားနိုင်ငံက တစ်ခြားသောဘာသာဝင်တွေလည်း လာရောက်လေ့လာထားတာတွေ့ရတယ်။
ကျမတို့ကို ထိုင်စောင့်ခိုင်းထားပြီး ခဏနေတော့ အမျိုးသားတစ်ဦးက လာခေါ်ပြီး ဗလီကြီးထဲနေရာအနှံ့လိုက်ပြပါတယ်။
၂၃ ဧကခွဲကျယ်တဲ့ ဝင်းကြီးထဲမှာ ၁၉၇၈ ခုနှစ်မှာ တည်ဆောက်ခဲ့တဲ့ Masjid Istiqlal က အရှေ့တောင်အာရှမှာ အကြီးဆုံးနဲ့ ကမ္ဘာမှာ တတိယ အကြီးဆုံးဖြစ်ပြီး လူ ၂သိန်း ဆန့်ပါတယ်။ အမြင့်၇ မီတာနီးပါးရှိ Minaret (မျှော်စင်)တစ်ခုသာ ထားရှိပြီး အဓိပ္ပါယ်က အလ္လာဟ်အရှင်မြတ်တစ်ပါးတည်း ရှိကြောင်းကိုရည်ရွယ်သလို ဗလီအတွင်းမှာ အထပ် ၅ ထပ်ရှိပြီး အစ္စလာမ့်မဏ္ဍိုင် ၅ ရပ်ကိုရည်ရွယ်ကြောင်း၊ တိုင်လုံးကြီးတွေ ၁၂ တိုင်ရှိခြင်းက တမန်တော်မြတ် မုဟမ္မဒ် (ငြိမ်းချမ်းပါစေ)ရဲ့ မွေးရက် ၁၂ ရက်နေ့ကို ရည်စူးပြီး၊ ဗလီအမိုးခုံးအဝိုင်းမှာ ၄၅ မီတာရှိပြီး အင်ဒိုနီးရှားနိုင်ငံရဲ့ လွတ်လပ်ရေးကြေညာတဲ့ ၁၉၄၅ ခုနှစ်ကို ရည်ညွှန်းတယ်လို့ သိရပါတယ်။ Bedok (စည်) ကြီးကြီးတစ်ခုကိုလည်းတွေ့ရပြီး ရမသွာန် (ဝါတွင်း)ကာလတွေမှာ အာဇံသံ (ဝတ်ပြုရန်လာဖို့ ဖိတ်ခေါ်ခြင်း) မပေးခင် စည်တီးလေ့ရှိတယ်လို့လည်း သိရတယ်။ ဗလီအတွင်း စည်းခြားထားတဲ့ တစ်ဘက်တစ်ချက်စီမှာ ဝတ်ပြုနေကြတဲ့ အမျိုးသားအမျိုးသမီးတွေကို မြင်ရသလို ကျမတို့လျှောက်ကြည့်ရာ တလျှောက်မှာလည်း လဲလျောင်း နားနေကြတဲ့အမျိုးသားများကို တွေ့ရသလို တချို့နေရာတွေမှာ အမျိုးသမီးတွေ လဲလျောင်းနားနေသူ၊ အဖွဲ့လိုက်ထိုင်ပြီး ဆွေးနွေးနေကြသူတွေကိုလည်း တွေ့ရပါတယ်။ အာရဗီသင်ကျောင်း (မဒရ်ဆာရ်)ရှိတာလည်း တွေ့ရတယ်။
.
အင်ဒိုနီးရှားနိုင်ငံရှိ လူမျိုးစုတစ်ခုရဲ့ အကြီးအကဲတစ်ယောက်ရဲ့ အခမ်းအနားတစ်ခုကို ဟောကြောကျင်းပနေတာလည်း ဗလီပုရဝုဏ်မှာ တွေ့ခဲ့ရတယ်။ ဗလီကနေ ထွက်လာပြီး မျက်နှာချင်းဆိုင်မှာရှိတဲ့ Katedral Church ဘက်ကို လေ့လာဖို့ ဝင်ခဲ့ပေမယ့် Sunday ဖြစ်နေတော့ ဘုရားကျောင်းတက်သူတွေနဲ့ ပြည့်ပြီး လူတအားများနေလို့ အတွင်းဘက်ကို မဝင်ဖြစ်တော့ပဲ ဘုရားကျောင်းပြင်ပကနေ ခဏကြည့်ပြီး ပြန်ထွက်လာလဲ့ပါတယ်။
Art Museum ကိုသွားတော့လည်း Sunday ဆိုတော့ ပိတ်ရက်ဖြစ်နေပြန်တယ်။ Jakarta မှာ နာမည်ကြီးတဲ့ ITC Mangga Dua Shopping Mall ကိုသွားဖို့ ဘတ်စ်ကားဂိတ်မှာ E-money Card ဝယ်ပြီး ကားစောင့်ရင်း နာရီဝက်ကြော်တဲ့အထိ မလာတာနဲ့ အဲ့ဒီအနားက Passer Baroe ဘက်ဝင်ပြီး ဈေးတန်းတလျှောက် လျှောက်ကြည့်ပြီးတာနဲ့ တုတ်တုတ်ငှါးပြီး Mangga Dua သွားပြီး ပတ်ကြည့်ပြန်တယ်။ ၇ ထပ်ရှိတဲ့ Mall ကြီးက လက်လီလက်ကားဆိုင်တွေနဲ့ ပြည့်နေတယ်။ အဲ့ဒီကထွက်တော့ Seafood စားရင်း Beach ဘက်သွားဖို့ တုတ်တုတ်ငှါးပြီးထွက်ခဲ့ပေမယ့် မောင်းသူကလည်း ကိုယ့်စကားနားမလည်တော့ ကိုယ်သွားချင်တဲ့နေရာမရောက်ပဲ တခြား beach တွေပဲ ရောက်နေတော့ နောက်ဆုံးတော့ ဗလီနဲ့ ဘုရားကျောင်းဘက်ပြန်သွားဖို့ပြောရင်း မြို့လည်ပန်းခြံကြီးရဲ့ ကိုယ်တွေမရောက်သေးတဲ့ဘက်အခြမ်း လျှောက်လည်ရင်း လေယာဉ်ကွင်းဆင်းဖို့ Bus Station ကို သွားလိုက်တော့တယ်။ ည ၉ နာရီခွဲလေယာဉ်ဆိုတော့ လေယာဉ်ချိန်က လိုသေးတာမို့ လေယာဉ်ကွင်းထဲလျှောက်လည်ရင်း Spa က Massage မှာ အပန်းဖြေရင်း အချိန်ကုန်ခဲ့ရတော့တယ်။
.
ဂျကာတာရဲ့ ရာသီဥတုက အလွန်ပူတယ်လို့ ခံစားရတယ်။ နေပူတာမျိုးမဟုတ်ပဲ အုံ့မှိုင်းမှိုင်းရာသီဥတုမှာ ပေါင်းခံစက်ထဲရောက်နေသလို လှောင်ပိတ်ပြီး ပူနေတာမျိုးပေါ့။
.
မြန်မာပြည်နဲ့တူတဲ့ ပုံစံလေးတွေလည်း အများကြီးတွေ့ရတယ်။ မြန်မာပြည် လမ်းဘေးမှာဖွင့်ထားတဲ့ ကွမ်းယာဆိုင်လိုပုံစံမျိုးနဲ့ အအေးဆိုင်, ဆေးလိပ်ဆိုင်လေးတွေ လက်တွန်းလှည်းနဲ့ရောင်းတဲ့ အသားလုံးခေါက်ဆွဲဆိုင်တွေ အအေးဆိုင်တွေ အကင်ဆိုင်တွေ မုန့်ပဲသရေစာမျိုးစုံဆိုင်တွေ ကလေးကစားစရာအရုပ်ဆိုင်တွေကိုလည်း တွေ့ရတယ်။
.
သွားလာရေးမှာ ဘတ်စ်တွေပေါလှသလို ရထားနဲ့လည်း အလွယ်တကူ သွားလာနိုင်တာကို တွေ့ရတယ်။
.
အင်ဒိုရဲ့ တခြားမြို့ကနေ ဂျကာတာကို လာလည်ကြဟန်တူတဲ့ လူတချို့ဆို မြန်မာပြည် ကျေးလက်က လူတွေရဲ့ ရုပ်သွင်ပြင်နဲ့ ပုံစံတူတွေရှိတာကိုလည်း တွေ့ရတယ်။
.
နှစ်ရက်တည်း ခရီးဖြစ်တာရယ် ဘာသာစကားအခက်အခဲရှိတာရယ်ကြောင့် သွားဖို့စီစဉ် ကြိုတင်ရွေးချယ်ထားတဲ့ နေရာအစုံကို မသွားခဲ့ရပေမယ့် မရောက်ဖူးတဲ့ဒေသ၊ အတွေအကြုံသစ်တွေရလို့ ပင်ပန်းပေမယ့်ကျမအတွက် ပျော်ရွှင်စရာနဲ့ အမှတ်တရ ခရီးစဉ်လေးတစ်ခု ဖြစ်ခဲ့ပါတယ်။

‪#‎Waing2016‬ 2122may2016

Jakarta အမှတ်တရ Photos များ >> 
https://www.facebook.com/nectarflowernectar/media_set?set=a.1027676573987136&type=3