ကျွန်မ အမှတ်ရမိတဲ့ ဆရာကံချွန်

ဆရာကံချွန်က လူငယ်တွေကို စကားပြောတဲ့အခါမှာ ‘ငါတူများ၊ ငါ့တူမများ’လို့ အမြဲသုံးနှုန်းလေ့ရှိပြီး ဆရာ့ကိုယ်ဆရာတော့ တစ်ခါတစ်လေမှာ ‘ဆရာ’၊ တစ်ခါတစ်လေမှာ ‘ငါ’ တစ်ခါတစ်လေမှာ ဦးကံချွန်လို့ သုံးနှုန်းလေ့ရှိတယ်။ ကျွန်မတို့ အပတ်စဉ်တနင်္ဂသင်တန်းလေးကို ဆရာကံချွန်က အပတ်စဉ်တိုင်းလိုလိုလာလေ့ရှိခဲ့တယ်။ ဆရာက သူ့ဘ၀ အတွေ့အကြုံတွေကို ပြောပြရင်း လူငယ်တွေကို သင်ခန်းစာတွေပေး၊ အတုယူဖွယ်တွေကို ရီစရာတွေနဲ့နှောပြီး ပြောပြလေ့ရှိတယ်။ သင်တန်း တစ်ရက်မှာ ဆရာကံချွန်က ခါတိုင်းလိုပဲ ကျွန်မတို့တွေကို စကားတွေပြောနေရင်းနဲ့ ပြောတယ်။ ‘ငါ့တူများ၊ ငါ့တူမများကို ငါတစ်ခုပြောပြမယ်။ အဲဒါက ဘ၀မှာ စိတ်ဓါတ်မကျဖို့နဲ့ အတုယူတတ်ဖို့ သင်ပေးတာ’ ဆိုပြီး ပြောပြခဲ့တာလေး ကျွန်မ အမှတ်ရမိတယ်။


“ဆရာ့ဘ၀မှာ ကြိုးစားရုန်းကန်ခဲ့ရတာတွေများတယ်။ အရင်က ဆရာ့မှာ ကိုယ်ပိုင်အိမ်မရှိခဲ့ဘူး။ နောက်ဆုံး အိမ်လေးတစ်လုံးဝယ်မယ်လုပ်တော့ လုံလောက်တဲ့ပိုက်ဆံက မရှိဘူး။ နေစရာအိမ်ကလည်းမရှိတော့ဘူး။ သမီးလေးလည်း အရွယ်ရောက်လာပြီဖြစ်တဲ့အတွက် အိမ်ပိုင်လေးတစ်လုံးရအောင် မဖြစ် ဖြစ်အောင် ၀ယ်ဖို့လိုအပ်လာပြီ။ ဒါကြောင့် အိမ်ဝယ်ဖို့ လုပ်ခဲ့တယ်။ အဲဒီအချိန်က မန္တလေးမှာ မြို့သစ်တွေစပြီးလုပ်ခါစ မြေတစ်ကွက် ကျပ်(၁၀၀၀)လောက်ပဲ ပေးရတဲ့အချိန်။ လက်ထဲမှာ အဲဒီ တစ်ထောင်ကို မရှိဘူး။ ဒီတော့ သူများဆီက ပိုက်ဆံချေးဖို့လုပ်ရတယ်။ မိတ်ဆွေအပေါင်းအသင်းတွေဆီ ချေးရင်တော့ ရနိုင်ပါတယ်။ ဘယ်သူပဲဖြစ်ဖြစ် ကိုကံချွန်ဆိုရင်တော့ ချေးငှားပေးမှာပါ။ ဒါပေမယ့် တစ်ယောက်တည်းဆီကနေ အားလုံးကိုမချေးချင်ဘူး။ ဒီတော့ ဘယ်လိုလုပ်လဲသိလား။ ဟိုလူဆီက (၁၀၀)၊ ဒီလူ့ဆီက (၅၀)၊ ဟိုတစ်ယောက်ဆီက (၁၅၀)၊ ဒီတစ်ယောက်ဆီက (၂၀၀)နဲ့ လူ (၁၀)ယောက်လောက်ဆီကနေ ချေးလိုက်တယ်။ အဲဒီတော့ တစ်ယောက်ခြင်းဆီကို နည်းနည်းစီပဲ ပြန်ဆပ်ရတော့တယ်။ တစ်ချို့ကဆို ပြန်ပေးမနေပါနဲ့တော့ ကိုကံချွန်ရာ ဆိုလို့ မပေးခဲ့ရတော့တာတွေလည်းရှိတယ်။ အဲဒီလူတွေကိုလည်း အခုထိ ကျေးဇူးတင်တယ်။ ဒီတော့ ငါတူများ၊ ငါ့တူမများ ဘယ်တော့မှ စိတ်ဓါတ်မကျနဲ့ဟုတ်ပြီလား။ အဲ လိုအပ်လို့ ပိုက်ဆံချေးတဲ့အခါမှာ ဘယ်တော့မှ တစ်ယောက်တည်းဆီကနေ လုံးကနဲ မချေးနဲ့။ ဟိုလူနည်းနည်း ဒီလူနည်းနည်းဆိုတော့ ချေးတဲ့သူလည်းချေးချင်တယ်။ ကိုယ်လည်း ပြန်ဆပ်ရသက်သာတယ်။ စေတနာရှိတဲ့လူနဲ့တွေ့ရင် ပြန်မဆပ်ရတော့တာလည်းရှိတယ်။ ဒါပေမယ့် ကိုယ်ကတော့ ပြန်ဆပ်ရမယ်။ မယူတာတော့ သူတို့အပိုင်း။ လူတွေမှာ ယုံကြည်မှုတစ်ခုပဲ။ ယုံကြည်မှုရှိရင် ချေးငှားကြမှာပဲ။ အဲဒါ ဦးကံချွန် အတွေ့အကြုံကို လူငယ်တွေကို ပြန်ပြောပြတာ။ ဟုတ်ပြီလား။ နောက်တစ်ခါ သူငယ်ချင်းတစ်ယောက်တည်းဆီက ပိုက်ဆံမချေးနဲ့။ သူငယ်ချင်းအများကြီးဆီက နည်းနည်းစီပဲချေး။ အဲ … ကိုယ်သွားချေးတဲ့သူငယ်ချင်းက ကိုယ်လိုပဲဆိုရင်တော့လည်း နားလည်မှုပေးပြီး ကိုယ်တတ်နိုင်သလောက် ပြန်ချေးလိုက်ပေါ့ကွာ။ အလကားစတာပါ။ တော်ကြာ ဒီလူကြီး ငါတို့ကို မဟုတ်တာတွေ သင်ပေးတယ်လဲ မပြောနဲ့ဦး။ ဦးကံချွန်က ဦးကံချွန် အတွေ့အကြုံလေးကို ပြန်ပြောပြတာ။ အဲဒီမြေကွက်ကလေးလဲပိုင်ရော တဲလေးဆောက်ပြီးနေကြတယ်။ ခြံဝန်းဘေးက အကာအရံမရှိဘူး။ အကာအရံသာမရှိတာ ခြံဝင်းမှာ တိုင်လေး ၂-တိုင်ဆောက်ပြီး ခြံဝင်းတံခါးလေးတော့ လုပ်ထားတယ်။ လူတွေရဲ့ အကျင့်များပြောပါတယ်။ ကိုယ့်အိမ်ထဲလည်း ဘာမှ သူများခိုးစရာမရှိတာတောင် အပြင်သွားတော့မယ်ဆိုရင် ဘေးကခြံစည်းရိုးပတ်လည်မရှိတဲ့ တံခါးလေး ၂-ချပ်ကို ပိတ်ပြီး သော့လေးခတ်ပြီးမှ အပြင်သွားတယ်။ အဲဒီတုန်းကတော့ ဟုတ်လှပြီ အောက်မေ့နေတာ။ အခုတွေးကြည့်ရင် ဦးကံချွန် အခု ရီချင်တယ်။ ကဲ …. ဟုတ်ပါပြီ အခုပြောပြတာတွေက ငါ့တူများ ငါ့တူမများ ဘ၀မှာ ဘယ်တော့မှ လွယ်လွယ်နဲ့စိတ်မညစ်၊ စိတ်ဓါတ်မကျနဲ့။ ဘယ်အရာပဲဖြစ်ဖြစ် နောက်ဆုံးမှာ ပြေလည်သွားတာပဲ။”

အဲဒါက အပတ်စဉ် တနင်္ဂနွေသင်တန်းဆွေးနွေးချိန်မှာ ဆရာကံချွန်ပြောဖူးခဲ့တဲ့စကားတွေထဲက နည်းနည်းပါ။

၂၀၀၀-ခုနှစ် ဆရာနဲ့စတင် ခင်မင်စဉ်က ဆရာကိုယ်တိုင် ချက်ချင်းဆွဲပေးလိုက်တဲ့ပုံလေးနဲ့ ဆရာ့ရဲ့ လိပ်စာကတ်ကလေး။

တစ်ခါတစ်ခါ မနက်ပိုင်း ကျွန်မ ခေါက်ဆွဲစားချင်လို့ ခေါက်ဆွဲဆိုင်သွားတဲ့အခါ ဆရာက သူ့မြေး ၂-ယောက်နဲ့ ခေါက်ဆွဲလာစားရင်းဆုံတဲ့အခါ ကျွန်တော်က “ဆရာနေကောင်းလား၊ သမီးကို မှတ်မိလားလို့” မေးရင် ဆရာက “သြော် … ညည်းတို့ကိုမှ မမှတ်မိရင် ငါက ဘယ်လိုလုပ် ဦးကံချွန်ဖြစ်တော့မလဲ”လို့ ပြန်ပြောတတ်ပါတယ်။

၂၀၀၄-ခု နှစ် နောက်ပိုင်းကစပြီး အပတ်စဉ် တနင်္ဂနွေသင်တန်းမှာ ဆရာကံချွန်ပါဝင်လာလို့ ဆရာနဲ့ ခင်မင်ရင်းနှီးသွားပြီးနောက် တနင်္ဂနွေနေ့ ကျွန်မသင်တန်းရောက်ဖြစ်ပဲ ခေါက်ဆွဲဆိုင်မှာ ဆရာနဲ့ဆုံဖြစ်ရင် ဆရာက အရင်စပြီး “ညည်းတို့အုပ်စု ဘာတွေလုပ်နေကြလဲ၊ ဘယ်တွေ ပျောက်နေတာလဲ။ ဟို တစ်ပတ်က ငါမတွေ့ဘူး။ ဘာတွေ ကြံစည်နေကြပြန်ပြီလဲ”ဆိုပြီး စနောက်လေ့ရှိတယ်။

နောက်ပြီး ခြေထောက်နာနေတာကို ဒုတ်ကောက်သုံးပြီး သင်တန်းကို ရောက်အောင်လာပြီး သင်တန်းပို့ချပေးခဲ့ပါတယ်။
အဲဒီမှာ ဆရာပြောခဲ့တာလေးကိုလည်း မှတ်မိတယ်။
“ငါတို့ အသိုင်းအ၀ိုင်းမှာ လူငယ်တွေ အများကြီးအသိပညာတိုးတက်ဖို့လိုတယ်။ လူငယ်တွေနဲ့ ဒီလိုဆွေးနွေးပြီးနေရတာ ငါလည်းပျော်တယ်။ အရင်နှစ်တွေက ငါက ချမ်းသာကုန်း(ပုလိပ်)ရောက်ရောက်နေလို့ ဒီကို မရောက်ဖြစ်ဘူး။ နောက်နှစ်တွေလည်း ငါ့ကို ခေါ်ရင်တော့ ငါက ဒီကို အရောက်လာမှာပဲ”လို့ ပြောခဲ့တဲ့ဆရာ ဒီ ၂၀၀၉-ခုနှစ် သင်တန်းကိုတော့ ဆရာ မလာရောက်နိုင်တော့ပါဘူး။ အဲဒီအချိန်မှာကတည်းက ဆရာ့ကျန်းမာရေးက တော်တော်လေးကို ချို့ယွင်းနေခဲ့ပြီလေ။
ကျွန်မတို့သူငယ်ချင်းတစ်စု ဆရာနဲ့အတူတူ ဓါတ်ပုံရိုက်ကြပြီး ဆရာ့ကိုပြတဲ့အခါ ဆရာကပြောတယ် “အဖေနဲ့သမီးများ”တဲ့။

ဆရာနဲ့ ကျွန်မ နောက်ဆုံး ဆုံဖြစ်လိုက်တာကတော့ ဆရာ မဆုံးခင် ၁-လ အလိုလောက်ကပါ။ ဆရာ ဆေးရုံကဆင်းပြီး ဆရာ့ကို လူမမာသွားမေးစဉ်ကပေါ့။ ဆရာ့ဆီသွားရင်းနဲ့ ဆရာ့ကို အင်တာဗျူးနည်းနည်းလုပ်ဖို့စဉ်းစားမိတယ်။ ဒါပေမယ့် ဆရာ့ကို တွေ့ပြီးတဲ့အခါမှာ အင်တာဗျူးလုပ်ဖို့စဉ်းစားလာတဲ့ မေးခွန်းတွေကို ပြန်သိမ်းပြီး ဆရာ့ကိုတောင် ခဏလေးပဲ စကားပြောပြီး ပြန်လာခဲ့မိတယ်။ ဆရာက စကားတစ်ခွန်းပြောဖို့အတွက်ကို မနည်းအားယူပြီး ပြောနေတယ်။ ကျွန်မတို့တွေ သူ့ဆီ လာမေးတဲ့အတွက်လည်း သူဝမ်းသာနေတယ်။ ကျွန်မတုိ့တွေ ဆရာ့ကို စကားသိပ်မပြောစေချင်တဲ့အတွက် နားဖို့ပြောပြီး ကျွန်မတို့ ပြန်တော့မယ့်အကြောင်း ဆရာ့ကိုပြောလိုက်တယ်။ ဆရာက သူ့ရောဂါကို သူသိနေပေမယ့် အခြားသူတွေ စိတ်ချမ်းသာအောင် သူ့ရောဂါကို သူမသိသလိုပဲနေပြခဲ့တယ်။ “ဘာမှစိတ်မပူပါနဲ့ မကြာခင် နေပြန်ကောင်းလာမှာပါ”လို့ ကျွန်မတို့ကို ဆရာက ပြန်ပြီး အားပေးစကားပြောခဲ့တယ်။ ကျွန်မတို့တွေ ဆရာ့အိမ်က အပြန်လမ်းတလျှောက်မှာ ဆရာ့အကြောင်းတွေ ပြောပြီး ပြန်လာခဲ့ကြတယ်။

ဒါပေမယ့် ဆရာ အလ္လာ့ဟ်အမိန့်ခံယူသွားချိန်(ကွယ်လွန်ချိန်)မှာတော့ ကျွန်မသိတာ နောက်ကျခဲ့ပါတယ်။
"ကျွန်မ အမှတ်ရမိတဲ့ ဆရာကံချွန်"အကြောင်း တစ်စိတ်တစ်ပိုင်းပါ။