မိဘမေတ္တာရအောင်ယူပါ

ကျွန်မဘ၀မှာ မေမေဆိုတဲ့ ဝေါဟာရ ခေါ်ဆိုခွင့်ပျောက်ဆုံးခဲ့တာ နှစ်တွေတော်တော်ကြာခဲ့ပါပြီ။ ကျွန်မသိတက်၊ နားလည်စအရွယ်မှာ မေမေတွိုက်ဖွိုက်ဖြစ်လို့ ဆေးရုံတက်ရပါတယ်။ မေမေ့မှာ နှလုံးရောဂါတော့ရှိတယ်။ ဒါပေမယ့် နှလုံးရောဂါအတွက်ကြောင့် မေမေဆေးရုံမတက်ခဲ့ရပါဘူး။ တစ်ခုသော နွေရာသီရဲ့ နေ့တစ်နေ့မှာပေါ့ ကျူရှင်လာကြိုနေကျ ကျွန်မရဲ့ မမအငယ် ကျူရှင်ဆင်းချိန်ထက် တော်တော်လေး နောက်ကျပြီးမှ ရောက်လာခဲ့တယ်။ ဘာလို့နောက်ကျတာလဲဆိုတော့ မေမေဆေးရုံတင်လိုက်ရလို့တဲ့။ ကျွန်မကျူရှင်ထွက်လာတုန်းကမှ အကောင်းကြီးကို ခဏလေးအတွင်းမှာ ဘယ်လိုများဖြစ်သွားတာပါလိမ့်။ အိမ်ပြန်ရောက်တော့ ကျွန်မက ကလေးဆိုတော့ ဆေးရုံမလိုက်သွားရပါဘူး။ အိမ်မှာဘဲ နေခဲ့ရတာပေါ့။

ကျွန်မတို့ပါပါ ဆေးရုံက ပြန်လာမှ ကျွန်မမေမေ ဘာဖြစ်တာလဲဆိုတာ သိလိုက်ရတယ်။ မေမေက အသည်းခြောက်တာတဲ့။ လူကြီးတွေ ပြေပြလို့ အသည်းခြောက်တယ်ဆိုတာ အရက်သောက်လို့ ဖြစ်တယ်ဆိုတဲ့ စကားကြောင့် အရက်မသောက်တဲ့ ကျွန်မမေမေ ဘာကြောင့်များ အသည်းခြောက်ရလဲဆိုတာ ကျွန်မမတွေးတက်ခဲ့ပါဘူး။ မေမေကျန်းကျန်းမာမာနဲ့ဘဲ ဆေးရုံက ပြန်ဆင်းခဲ့ရပါတယ်။ အဲ့နောက်ပိုင်းမှာ ကျွန်မတို့အိမ်က ကျွန်မတို့အိမ်က မနက်မိုးလင်းရင် အလုပ်သွားတဲ့လူကသွား၊ ကျောင်းသွားတဲ့သူ သွားနဲ့ဆိုတော့ တစ်ယောက်တည်းကျန်နေခဲ့တက်တဲ့ မေမေ့ကို စိတ်မချတာနဲ့ ကျွန်မတို့ အဖိုး(မေမေ့ရဲ့ ပါပါ)အိမ်မှာ အမြဲပို့ထားခဲ့ရပါတယ်။ အဲ့အချိန်ကစလို့ ကျွန်မမေမေ့အနားမှာ အချိန်ပြည့်ကပ်ခွင့် မရတော့ပါဘူး။ ကျောင်းပိတ်ရက်တွေကျမှဘဲ မေမေ့နားကပ်ပြီး ဂျီကျရပါတော့တယ်။ ဒီလိုနဲ့ဘဲ မေမေက ဆေးရုံတက်လိုက် ၊ ဆင်းလာလိုက်၊ နေကောင်းသွားလိုက်နဲ့ သုံးနှစ်ကျော် လေးနှစ်လောက် နေခဲ့ရတယ်။

ကျွန်မ (၇)တန်းဖြေထားတဲ့ ၂၀၀၂ခုနှစ်၊ ဧပြီလရဲ့ နေ့တစ်နေ့မှာပေါ့၊ မေမေ့ကို ကျွန်မတို့အဖိုးအိမ်ကနေ ဆေးရုံထပ်တင်လိုက်ရတယ်။ မေမေက ဆေးရုံကို တက်လိုက်၊ ဆင်းလိုက် လုပ်နေရတော့ မေမေဆေးရုံတက်ရတယ်ဆိုတာ ကျွန်မတို့အတွက် အရမ်းကြီးထူးဆန်းလို့ မနေတော့ပါဘူး။ ဆေးရုံပေါ်မှာ ရက်အနည်းငယ် နေလိုက်ရင် ပြန်ကောင်းသွားတာကိုး။
ကျွန်မကတော့ ကလေးဆိုတော့ ထုံးစံအတိုင်း ဆေးရုံပေါ်က မေမေ့ဆီကို နေ့တိုင်းမရောက်ဖြစ်ပါဘူး။ ဧပြီလ(၂၇)ရက်နေ့ ညနေစောင်းမှာ ကျွန်မ မေမေ့ဆီကို တစ်ခေါက်ထပ်ရောက်ခဲ့ပါတယ်။ ကျွန်မရောက်တော့ မေမေအိပ်ပျော်နေတာနဲ့ ကျွန်မမေမေနဲ့ စကားမပြောခဲ့လိုက်ရပါဘူး။ နောက်ရက် (၂၈)ရက်နေ့ကျတော့ ကျွန်မမေမေ့ဆီ မရောက်ဖြစ်ဘူး။ ပါပါပြန်လာတော့ မေမေတော်တော်သက်သာသွားပြီင်္ဆိုလို့ ကျွန်မတို့တွေ ၀မ်းသာရပါတယ်။

မေမေ့ကို ဆေးရုံမှာ ကျွန်မ မမကြီးရယ်၊ မေမေ့တူမ(ကျွန်မတို့ အစ်မ၀မ်းကွဲတစ်ယောက်)ရယ် စောင့်အိပ်ကြပါတယ်။ ကျွန်မကတော့ မေမေသက်သာသွားပြီဆိုလို့ ၀မ်းသာပြီး အိပ်လိုက်တာ နှစ်နှစ်ခြိုက်ခြိုက်ဘဲ။ (၂၉)ရက်၊ တနင်္လာနေ့ မနက်ဝေလီဝေလင်းကြီးမှာ အိမ်ရှေ့ကနေ ကျွန်မတို့ ပါပါကို ခေါ်တဲ့အသံကြားလို့ ထွက်ကြည့်လိုက်တော့ ဆေးရုံနားမှာနေတဲ့ ပါပါတို့ရဲ့ မိတ်ဆွေက ဆေးရုံလိုက်ခဲ့ဖို့လာခေါ်ပါတယ်။ တကယ်ဆို မေမေသက်သာသွားပြီလို့ ပါပါပြောခဲ့တာကို ဘာလို့ ကျွန်မတို့ ဆေးရုံကို အရေးတကြီးလိုက်ရတာလဲနော်။ ဒီတစ်ခါတော့ ကျွန်မအိမ်မှာ မနေခဲ့ရပါဘူး။ ဆေးရုံလိုက်သွားခဲ့ရပါတယ်။ ဆေးရုံအ၀င်ဝလည်း ရောက်ရော မျက်ရည်တွေရွဲနေတဲ့ ကျွန်မ မမကြီးကို တွေ့လိုက်ရပါတယ်။ ကျွန်မတစ်ခုခုကို သဘောပေါက်လိုက်သလိုပါဘဲ။

ဒါပေမယ့် ကျွန်မတို့ စကားတစ်ခွန်းမှ မဆိုဖြစ်ဘဲ ဆေးရုံပေါ်ထိ တက်ခဲ့ကြတယ်။ အခန်းဝလည်း ရောက်ရော မေမေ့ ကုတင်ဘေးမှာ ၀တ်ဖြူစတွေ ကာထားတာကို မြင်လိုက်ရတဲ့အချိန်မှာတော့ ကျွန်မမျက်ရည်တွေကို ထိန်းမထားနိုင်တော့ပါဘူး။ ပြောတော့ မေမေက သက်သာပြီဆိုပြီး ဘာလို့ ကျွန်မတို့တွေကို ထားခဲ့ရတာလဲနော်။ ကျွန်မတို့ ညီမသုံးယောက်လုံး မျက်ရည်မထိန်းနိုင်ကြပါဘူး။ ကျွန်မကြီးပြင်းခဲ့သမျှ တစ်လျှောက်လုံး ကျွန်မတို့ပါပါ မျက်ရည်ကျတာကို မေမေဆုံးတုန်းက တစ်ခါဘဲတွေ့ဖူးပါတယ်။

ကျွန်မကို ကျွန်မမေမေက ငယ်ငယ်လေးတုန်းက မေတ္တာအပြည့်ပေးခဲ့မှာပါ။ ဒါပေမယ့် ကျွန်မငယ်သေးတော့ မေမေ့မေတ္တာကို အပြည့်အ၀မခံစားတက်သေးပါဘူး။ ကျွန်မနည်းနည်းလေး နားလည်စပြုတဲ့အချိန်လည်းရောက်ရော ကျွန်မမေမေက(ကျန်းမာရေးကြောင့်) ကျွန်မနဲ့ တူတူမရှိနေနိုင်ပါဘူး။ ကျွန်မထင်ထားတာ တစ်နေ့နေ့မှာတော့ မေမေ့ဘေးမှာ အမြဲနေရမှာဘဲလို့။ ဒါပေမယ့် အဲ့လိုမဟုတ်ဘူး မေမေက ကျွန်မတို့ကို အစောကြီး ထားခဲ့တယ်။ မေမေသာ ကျွန်မကို ထားခဲ့မယ်ဆိုတာသာ ကြိုသိခဲ့ရင် ကျွန်မမေမေ့နားမှာ တစ်ချိန်လုံး နေခဲ့မှာပေါ့။ နောက်ဆုံး ကျွန်မဆေးရုံရောက်တဲ့ရက်က ကျွန်မမေမေ့ကို နှိုးပြီး စကားတွေပြောခဲ့မှာပေါ့။ ခုတော့ ကျွန်မမေမေ့ကို ဘာမှတောင် ပြောခွင့်မရလိုက်ပါဘူး။ ခုချိန်မှာ တွေးကြည့်လေ ရင်နာမိလေပါဘဲ။

အလ္လာဟ့်အလိုတော်နဲ့ မေမေက ကျွန်မအတွက် ကျွန်မချစ်တဲ့ပါပါရယ်၊ ကျွန်မကို အမေလိုရော အမတစ်ယောက်လိုရော စောင့်ရှောက်ပေးမယ့် ကျွန်မချစ်တဲ့ ကျွန်မမမအကြီးရယ်၊ ကျွန်မနဲ့ သွားအတူ လာအတူ တပူးတွဲတွဲရှိခဲ့တဲ့ ကျွန်မချစ်တဲ့ ကျွန်မ မမအငယ်ရယ်ကို ကျွန်မနားမှာ ထားပေးခဲ့ပါတယ်။

ကျွန်မမေမေဆုံးတဲ့အချိန်က ငိုခဲ့တယ်၊ မျက်ရည်တွေအများကြီးကျခဲ့တယ်။ အရမ်းလည်း ခံစားခဲ့ရပါတယ်။ ခုချိန်မှာ အဲ့အချိန်ကလောက် မျက်ရည်မကျနိုင်ပါဘူး။ ဒါပေမယ့် ခုခံစားရတာက အဲ့အချိန်က ခံစားရတာထက်ကိုပိုပါတယ်။ ခုဆို ပျော်ရွှင်နေကြတဲ့ သားအမိတွေကို မြင်တိုင်း ကျွန်မရင်ထဲမှာ တဆစ်ဆစ်နဲ့ ဖော်မပြတက်တဲ့ ဝေဒနာတစ်မျိုး အမြဲခံစားရပါတယ်။ အဲ့ဒါကြောင့် ခု ကျွန်မပါပါနဲ့ ကျွန်မ မမနှစ်ယောက်ကို သက်ရှိထင်ရှားရှိနေစဉ်မှာ ကျွန်မဆီက မေတ္တာတွေလည်း ပေးမယ်၊ သူတို့ဆီက မေတ္တာတွေလည်း ကျွန်မအများကြီးရအောင် ယူမယ်လို့ ဆုံးဖြတ်မိတယ်။

သူငယ်ချင်းတို့တွေလည်း ကိုယ့်မိဘတွေ သက်ရှိထင်ရှားရှိနေစဉ်မှာ မိဘမေတ္တာကို ရအောင်ယူပါ။ ကိုယ့်ဆီကနေလည်း ပေးပါ။ အချိန်တွေ နှောင်းသွားမှဆို ကျွန်မတို့ ဘာမှ တက်နိုင်ကြမှာ မဟုတ်တော့ပါဘူးဆိုတာကို ကျွန်မရင်နဲ့ ရင်းပြီးရထားတဲ့ အသိတစ်ခုနဲ့ အကြံပေးပါရစေ။

post by - ကြယ်စင်ချို (http://www.mmsy.org/profiles/blogs/2609488:BlogPost:350698)