Community Journalist မှသည် Professional Journalist ဆီသို့ လျှောက်လှမ်းကြရာဝယ် (၁)

ဟိုတစ်ရက်က “မြန်မာ့ စတုတ္ထမဏ္ဍိုင်ဝင်တို့ သတိမူဖွယ်”ဆိုတဲ့ ဆောင်းပါးထဲကလို ကျွန်မတို့အားလုံးဟာ Community Journalist (CJ) တွေဖြစ်နေကြတယ်လေ။ CJ ကို Citizen Journalist လို့လည်း အများစု ပြောကြပါတယ်။ Citizen ဆိုတာရင် နိုင်ငံအဆင့်၊ အဖွဲ့ကိုအခြေခံသွားပြီလေ။ Community ဆိုတာတော့ လူထုအခြေပြုဆိုတော့ ဒီနေရာမှာ ကျွန်မအနေနဲ့ Community Journalist လို့ပဲ သုံးလိုက်ပါတယ်။

ဒီတော့ အဲဒါကို စိတ်မ၀င်စားပဲ CJ ဖြစ်နေသူတွေအတွက်က ဘာမှ ထွေထွေထူးထူးသိပ်လေ့လာနေစရာမလိုပါဘူး။ ဒါပေမယ့် ကိုယ်တိုင်က ကွန်မြူနတီဂျာနယ်လစ်ကို စိတ်ဝင်စားလို့ ကွန်မြူနတီဂျာနယ်လစ် (CJ) ဖြစ်နေသူတွေအတွက်လည်း သိသင့်တဲ့အချက်လေးတွေရှိပါတယ်။ ကျွန်မတို့တွေဟာ ကွန်မြူနတီဂျာနယ်လစ်တွေကနေတဆင့် ပရော်ဖက်ရှင်နယ်ဂျာနယ်လစ်တွေအထိ ဖြစ်သွားကြရင် ကျွန်မတို့တွေရဲ့ ၀န်းကျင်မှာဖြစ်ပျက်နေတဲ့ အကြောင်းအရာတွေကို မှန်မှန်နဲ့မြန်မြန် သတင်းတွေဖြန့်ဝေနိုင်ကြရင် နိုင်ငံရဲ့ စတုတ္ထမဏ္ဍိုင်လို့ပြောနေကြတဲ့ မီဒီယာကဏ္ဍကို ကျွန်မတို့တွေ တဘက်တလမ်းကနေ အားဖြည့်ရာရောက်ပြီး နိုင်ငံ့တာဝန်ကို တစ်တပိုင်တနိုင်ထမ်းရွက်ခြင်း မည်တာပေါ့။

ဂျာနယ်လစ်လို့ပြောတာနဲ့ မီဒီယာရဲ့ အခန်းကဏ္ဍကလည်း မပါလို့ကို မရပါဘူး။ ဒီတော့ မီဒီယာအကြောင်းလေးကိုလည်းနည်းနည်းတော့ ထည့်ပြောပါဦးမယ်။ ဒီတော့ ဒီအပိုင်း(၁)မှာ မီဒီယာ ကဏ္ဍကို ပြောပြချင်ပါတယ်။

မီဒီယာဆိုတာဘာလဲ ! မီဒီယာ ဘယ်နှစ်မျိုးရှိလဲ !

မီဒီယာမှာ အဓိကကတော့ Print Media နဲ့ Non Print Media ဆိုပြီး ၂-မျိုးရှိပါတယ်။ (သတင်းစာ၊ ဂျာနယ်၊ မဂ္ဂဇင်း၊ လက်ကမ်းစာစောင်၊ Billboard(ကြော်ငြာဆိုင်းဘုတ်), TV, ရေဒီယိုအစီအစဉ်တွေဟာလည်း မီဒီယာတွေပါပဲ။) အခုမှာတော့ Online ကလည်း မီဒီယာတစ်ခုအဖြစ် ရပ်တည်နေပါပြီ။ မီဒီယာမှာမှ ကျင့်ဝတ်လိုက်နာတဲ့မီဒီယာရယ်၊ ကျင့်ဝတ်မလိုက်နာတဲ့မီဒီယာရယ် ၂-မျိုးပြန်ပြီး ကွဲပြားပြန်ပါတယ်။ အဲဒီအထဲကမှ ကျင့်ဝတ်လိုက်နာတဲ့မီဒီယာမှာပဲ ပရော်ဖက်ရှင်နယ်(Professional)မီဒီယာ၊ ၀ါဒဖြန့်မီဒီယာနဲ့ လှုံ့ဆော်မီဒီယာဆိုပြီး ပြန်ပြီး ကွဲသွားပြန်တယ်။ ဒီတော့ ကိုယ့်မီဒီယာက ဘယ်အမျိုးအစားထဲ ပါဝင်နေလဲဆိုတာ ပြန်ပြီး သုံးသပ်ကြည့်ကြဖို့လိုပါတယ်။



မီဒီယာတွေမှာလည်း သူတို့တာဝန်တွေရှိပါတယ်။ ကျင့်ဝတ်မလိုက်နာတဲ့မီဒီယာကတော့ မီဒီယာလို့ကို သတ်မှတ်ဖို့မသင့်တော့တဲ့ မီဒီယာပါပဲ။ ဒီတော့ ကျင့်ဝတ်လိုက်နာတဲ့အထဲက ပရော်ဖက်ရှင်နယ် မီဒီယာတစ်ခုရဲ့ တာဝန်တွေက အဓိကအားဖြင့် ၃-မျိုးရှိလာတယ်။ (၁) To Entertain ဆိုတဲ့ဧည့်ခံဖျော်ဖြေရန် (၂) To Explain (or) Educate ရှင်းပြ (ဒါမှမဟုတ်) ပညာပေးရန် (၃) Interests of the people ဆိုတဲ့ လူထုကို စိတ်ဝင်စားရန် (လူထုကို စိတ်ဝင်စားရန်ဆိုတာ ပြောရမယ်ဆိုရင် Human Right ကို အထူးအလေးထားဖို့ကို ဆိုလိုခြင်းဖြစ်ပါတယ်။) ဆိုတဲ့ (၃)ချက်ဟာ မီဒီယာတွေရဲ့ အဓိက တာဝန်ပါပဲ။

ဒီလို တာဝန် ၃-ခုကို ပီပီပြင်ပြင်ထမ်းဆောင်နိုင်တဲ့မီဒီယာအနေနဲ့ အမြဲတမ်း ၁-ဘက်ဘက်ကို ရပ်တည်နေရပါမယ်။ ဆိုလိုတာက ဥပမာ - အတိုက်အခံနဲ့ အစိုးရ ကိစ္စရပ်တွေကိုရေးမယ်ဆိုရင် တစ်ဘက်ဘက်ကရပ်တည်နေရပါမယ်။ အတိုက်အခံဘက်ကဆိုလည်း အတိုက်အခံဘက်က၊ အစိုးရဘက်ကဆိုလည်း အစိုးရဘက်က အဲလို ရပ်တည်ရပါတယ်။ အလယ်မှာ ခွထိုင်ပြီး ဟိုဘက်ယိမ်းလိုက်၊ ဒီဘက်ယိမ်းလိုက် မဖြစ်သင့်ပါဘူး။ ဒါပေမယ့် သတင်းရေးရင်တော့ ဘက်လိုက်မှုမရှိအောင် ကြိုးစားသင့်ပြန်ပါတယ်။
ပြီးတော့ မီဒီယာတွေအနေနဲ့ Conflict Reporting တစ်ခုကို ဖော်ပြတော့မယ်ဆိုရင် အဲဒီ ကိစ္စရပ်ဖြစ်တဲ့နေရာဒေသဆီကို အတတ်နိုင်ဆုံး အရောက်သွားပြီး သတင်းယူဖို့လိုပါတယ်။ Conflict ဆိုတာ ဥပမာ - အခုလက်ရှိ ကချင်ပြည်နယ်၊ ရခိုင်ပြည်နယ်အရေးကိစ္စတွေအပါအ၀င် ကိုယ်လက်ရှိရှိနေတဲ့နေရာဒေသက ယာဉ်တိုက်မှုဖြစ်တာအထိကို ဆိုလိုပါတယ်။

ဒီတော့ ကျင့်ဝတ်ကိုလိုက်နာတဲ့ မီဒီယာမှန်ရင် သတင်းကိုသေချာမလေ့လာပဲ သတင်းဦးသတင်းထူးဖြစ်ပြီးရောဆိုတာမျိုး မလုပ်သင့်ဘူးဆိုတာ ပေါ်လွင်ပါတယ်။ ကိုယ့်မီဒီယာဟာ ဂုဏ်သိက္ခာရှိပြီး နိုင်ငံ့တာဝန်ကို ကျေပွန်စွာထမ်းဆောင်ပေးနိုင်တဲ့ မီဒီယာအဖြစ် ရပ်တည်နိုင်ကြပါစေ ….. ။

x x x x x x x x x x x x

ကွန်မြူနတီဂျာနယ်လစ်(CJ)မှသည် ပရော်ဖက်ရှင်နယ်လ်ဂျာနယ်လစ်ဆီသို့ ခေါင်းစဉ်နဲ့တင်ပြနေတဲ့နေရာမှာ  ပြီးခဲ့တဲ့အပိုင်းမှာတော့ မီဒီယာဆိုတာကို ပြောပြခဲ့ပြီးပါပြီ။ မီဒီယာလည်းသိပြီဆိုတော့ မီဒီယာတွေမှာဖော်ပြနေတဲ့ သတင်းဆိုတာရယ်၊ အဲဒီသတင်းတစ်ခုရဖို့စုဆောင်းတင်ပြသူ Journalist/ Reporter တွေရဲ့ အခန်းကဏ္ဍကို ပြောပြပါ့မယ်။

သတင်းဆိုတာ ဘာလဲ (What is NEWS)

မီဒီယာတွေမှာဖတ်နေရတာတွေကို သတင်းလို့သိထားတယ်။ ဒါပေမယ့် သတင်းဆိုတာဘာလဲလို့ မေးလာရင် ဘာဖြေမိမလဲ။ ကျွန်မစဉ်းစားမိတာက သာမန်ထက်ပိုပြီးထူးခြားတဲ့ အကြောင်းအရာတွေကို အများလူထုသိအောင် ပြောပြရေးသားတာ သတင်းလို့ ကျွန်မတွေးလိုက်မိတယ်။ ပြီးတော့ “ခွေးက လူကိုကိုက်ရင် သတင်းမဖြစ်ပေမယ့်၊ လူက ခွေးကိုကိုက်ရင် သတင်းဖြစ်တယ်”လို့ ကျွန်မသိထားခဲ့တယ်။ ဒါနဲ့ တစ်ယောက်က မေးတယ်။ ဥပမာ - ထက်ထက်မိုးဦးက ကြော်ငြာရိုက်ရင်း ရိုက်ကွင်းမှာ ခွေးကိုက်ခံရတယ်ဆိုရင် သတင်းဖြစ်လားတဲ့မေးတယ်။ ဟုတ်တယ် အဲဒါဆိုရင်တော့ သတင်းဖြစ်နိုင်တယ်။ ဘာလို့လဲဆိုတော့ ထက်ထက်မိုးဦးက သာမန်လူတွေထက် ထူးခြားသူ (ပြည်သူ့ အချစ်တော် သရုပ်ဆောင်မင်းသမီး) ဖြစ်နေတဲ့အတွက် အဲဒါဟာ သတင်းဖြစ်တယ်။ ဒီတော့ ဘယ်လို အခြေအနေမျိုး တွေကို သတင်းလို့ခေါ်ပါသလဲ။
သတင်းဆိုတာ အင်္ဂလိပ်လိုက NEWS လေ။ North (အနောက်)၊ East (အရှေ့)၊ West (မြောက်)၊ South (တောင်)စတဲ့ အရှေ့အနောက်တောင်မြောက်ဆိုတဲ့ စကားလုံးဖြစ်တဲ့အတွက် အရပ်လေးမျက်နှာ ပတ်ပတ်လည်က အကြောင်းအရာတွေကို ဆိုလိုတယ်လို့လည်း အခုကာလမှာ ပြောလာကြတယ်။

သတင်းတစ်ခုဖြစ်ဖို့အတွက် အဓိက လိုအပ်တာက အချိန်(Timeliness)ပါ။ ဥပမာ - ဒေါ်အောင်ဆန်းစုကြည် အကျယ်ချုပ်က လွတ်မြောက်လာတဲ့အကြောင်းကို အခုချိန်မှဖော်ပြမယ်ဆိုရင် အလွန်ကိုနောက်ကျနေပါပြီ။ ဒါကြောင့် သတင်းတစ်ခုဖြစ်ဖို့အတွက် ဖြစ်နေတဲ့အကြောင်းရဲ့ အချိန်ကလည်း အဓိကနေရာက ရှိနေပါတယ်။ ပြီးရင် အချက်အလက် (Information) ဆိုတဲ့ ဘာအကြောင်းအရာလဲဆိုတာလိုပါတယ်။ ပြီးရင်တော့ အဲဒီ အကြောင်းအရာအချက်အလက်တွေက အများလူထုအတွက် အသုံးဝင်မှု (Usefulness) ရှိရဲ့လား။ နောက် အဲဒါတွေက ပြည်သူလူထု တကယ် စိတ်ဝင်စားမှု (Interesting) ရှိစေတာလား၊ သူတို့တွေအတွက်အကျိုးသက်ရောက်မှု (Impact) ရှိရဲ့လား။ ဒါမှမဟုတ် ပြည်သူလူထု ကို ဖျော်ဖြေမှု(Entertaining) ပေးရုံပဲလား။ အဲဒီအကြောင်းအရာတွေက အခုမှဖြစ်လာတဲ့၊ တစ်ခါမှ မသိကြသေးတဲ့ အသစ်ဖြစ်မှု (New Matter) လားဆိုတဲ့ အချက်တွေရှိမှသာ သတင်းဆိုတာဖြစ်လာပါတယ်။

သတင်းတစ်ခုကို ကိုယ့်မီဒီယာမှာ ဖော်ပြဖို့အတွက် သတင်းဆိုတာမှာ တာဝန်အရှိဆုံးသူက အယ်ဒီတာ (Editor) ဖြစ်ပါတယ်။အယ်ဒီတာမှာတာဝန်ရှိတယ်ဆိုလို့ ကျန်တဲ့သူတွေမှာ တာဝန်မရှိတော့တာမျိုးမဟုတ်ပါဘူး။ Journalist/ Reporter တွေမှာလည်း တာဝန်ရှိပါတယ်။

ဒါကြောင့် ဒီနေ့အချိန်မှာ ပြောလာကြတာက “(၁) ဂျာနယ်လစ် တစ်ယောက်ရဲ့ ပထမဆုံးတာဝန်က လူတွေအတွက်ဖြစ်တယ်။ (၂)စာဖတ်သူကို လုံးဝမမေ့ပါနဲ့။ (ကိုယ့်ရဲ့ စာဖတ်သူတွေက ဘယ်သူတွေလဲဆိုတာကို သိထားပါ။) (၃) ဂျာနယ်လစ်တွေအနေနဲ့ သူတို့ရေးနေတာတွေက ဘယ်သူ့အတွက်လဲဆိုတာကို လုံးဝ မမေ့ပါနဲ့” တဲ့။

ဒီတော့ Journalist, Reporter နဲ့ပတ်သက်ပြီး ဆက်ပြောရရင် ... …

Reporter ဆိုတာ ဘာလဲ ?

Readiness (အမြဲအသင့်ရှိနေသူ)၊ Education (အသိပညာရှိသူ)၊ Public Relation (လူမှုပေါင်းသင်း ဆက်ဆံရေးကောင်းသူ)၊ Observation (လေ့လာမှုအားကောင်းသူ)၊ Responsibility (တာဝန်ယူတတ်မှုရှိသူ)၊ Truth (အမှန်ကိုမြင်တတ်သူ)၊ Evaluation (ပိုင်းခြားသုံးသပ်တတ်သူ)၊Reading (စာများများဖတ်သူ)
ဒီတော့ Reporter တစ်ယောက်ဟာ သတင်းတွေရယူဖို့အတွက် အမြဲအသင့်ရှိနေရမယ်၊ အသိပညာဗဟုသုတ ကြွယ်ဝရမယ်၊ လူမှုပေါင်းသင်းဆက်ဆံရေးကောင်းရမယ်၊ ပတ်ဝန်းကျင်ကို လေ့လာမှုအားကောင်းရမယ်၊ ကိုယ်ရယူလိုက်တဲ့သတင်းအပေါ်မှာ တာဝန်ယူမှုရှိရမယ်၊ အမှားအမှန်ကိုသိမြင်ပြီး ပိုင်းခြားသုံးသပ်နိုင်သူဖြစ်ရမယ်၊ ပြီးတော့ စာများများဖတ်သူလည်း ဖြစ်ရပါမယ်။

အခုကာလမှာ ဂျာနယ်လစ်ဆိုတဲ့စကားလုံးဟာ တော်တော်ရေပန်းစားလာတဲ့စကားလုံးဖြစ်ပါတယ်။ ရီပို့တာဆိုတဲ့ သတင်းထောက်ဆိုတာလည်း ပေါ်ပြူလာဖြစ်လာနေပါတယ်။ ဒီတော့ တစ်ခါတစ်လေမှာ ဂျာနယ်လစ်တွေ ဂျာနယ်လစ်တွေ လို့သုံးနှုန်းနေကြတာ တွေ့လာရတယ်။ ဒါပေမယ့် ဂျာနယ်လစ်နဲ့ ရီပိုတာဟာ မတူပါဘူး။

ဘယ်လိုကွာခြားလို့လဲဆိုရင် အနီးစပ်ဆုံး ဥပမာပေးရရင် ကျူတာတစ်ယောက်နဲ့ ကထိကတစ်ယောက်လိုပါပဲ။ ကျူတာရော ကထိကရော စာသင်တာချင်းအတူတူမှာ ကထိကက ပိုတော်လို့ ကထိကဖြစ်လာတာလေ။ (ဒီဘက်ခေတ်မှာ တစ်ခြားအကြောင်းတွေကြောင့် ကထိကဖြစ်လာတာကို မတွေးပါနဲ့။)

ဂျာနယ်လစ်ရော ရီပိုတာရော လူတွေနဲ့ထိတွေ့ရတာချင်းအတူတူမှာ ရီပိုတာက သတင်းကိုပဲရေးပါတယ်။ ဂျာနယ်လစ်တစ်ယောက်ကတော့ သတင်းရေးရုံတင်မဟုတ်ဘဲ အဲဒီသတင်းအပေါ်မှာလည်း လေ့လာသုံးသပ်နိုင်ပါတယ်။ သူ့မှာတော့ အိုင်ဒီယာ(Idea) ပါရတယ်။ ဂျာနယ်လစ်တစ်ယောက်ဟာ အယ်ဒီတာ၊ ရီပို့တာ၊ အစရှိတဲ့ စာနယ်ဇင်းနဲ့ပတ်သက်တာတွေ အားလုံး လုပ်နိုင်ရပါတယ်။

ဂျာနယ်လစ်/ရီပို့တာ တစ်ယောက်ရဲ့ အရည်အချင်းက ဘာတွေလဲ ?

ဂျာနယ်လစ်တစ်ယောက်အနေနဲ့ မေးခွန်းများများမေးတတ်ရပါမယ်။ ပြီးတော့ ဗဟုသုတရှိရမယ်၊ စာများများဖတ်ရမယ်၊ နားထောင်တတ်ရမယ်၊ စိတ်ကိုဖွင့်ထားပြီး အကြောင်းအရာတွေအပေါ်မှာ လက်ခံပေးနိုင်ရပါမယ်။ မျှတစွာတွေးတတ်ရမယ်၊ စာဖတ်သူအပေါ်မှာ တာဝန်ယူမှုရှိနိုင်ရမယ်၊ ရလာတဲ့သတင်းအချက်အလက်တွေကို သေချာစွာ စစ်ဆေးနိုင်ရမယ်။ လိုအပ်ရင် Double check လုပ်နိုင်ရမယ်။ နောက်တစ်ခုက ရိုးသားမှုရှိရပါမယ်။ မသိတာကို မသိကြောင်း ပြောနိုင်ရမယ်။ တစ်ခြားကနေ ကူးယူပြီး ကိုယ်ရေးတာမျိုး မပြုလုပ်သင့်ဘူး။ စိတ်ဝင်စားမှုရှိရမယ်။ နောက်ဆုံးအနေနဲ့ ထိုးထွင်းဖန်တီးတွေးတောနိုင်စွမ်း (creative thinking) ရှိရပါမယ်။

“သတင်းထောက်တစ်ယောက်ဟာ အရာအားလုံးရဲ့ နည်းနည်းစီကို သိနေရပါမယ်။ ဒါပေမယ့် အရာတစ်ခုကိုတော့ အစအဆုံး အပ်ကျတာကအစ သိနေရမယ်။”

ဂျာနယ်လစ်တစ်ယောက်ရဲ့ အခန်းကဏ္ဍက ဘာလဲ

အမှန်တရားကို ရှာဖွေနိုင်ရမယ်။ အစိုးရနဲ့ပြည်သူလူထုကြားမှာ ပေါင်းကူးဆက်သွယ်ပေးနိုင်ရမယ်။ ပြည်သူလူထုကို အသစ်အသစ်သောသတင်းတွေ မပြတ်ပေးနိုင်ရမယ်။ ပြည်သူလူထုကို ပညာပေးမှု၊ အသိပေးမှု၊ ဖျော်ဖြေမှု ပေးနိုင်ရမယ်။ လူထုရဲ့စိတ်ဝင်စားမှုကို ရှာဖွေဖော်ထုတ်ပေးနိုင်ရမယ်။

အဲဒါတွေပြည့်ဝဖို့အတွက် လေ့လာမှုရှိပါ။ မပြောပါနဲ့ လုပ်ပါ။ (အပြောထက် အလုပ်နဲ့သက်သေပြပါ။) သတိထားပါ (လိုအပ်ရင် ကျီးကန်းတောင်းမှောက်ကြည့်ပါ။) ကိုယ့်ကိုယ်ကို ကန့်သတ်မထားပါနဲ့။ လေ့လာပါ။ (လူတစ်ယောက်ကို ခြေစခေါင်းဆုံး ကြည့်ပါ။၊)

ဂျာနယ်လစ်တစ်ယောက်ဟာ လေ့လာမှု (Observation) အားကောင်းဖို့လည်း လိုအပ်ပါတယ်။ လေ့လာမှုဆိုတာမှာ အမြင်၊ အကြား၊ အရသာ၊ အသိ၊ အတွေ့အထိနဲ့ ခံစားချက် တွေပါဝင်ပါတယ်။

နောက်ပြီးတော့ သတင်းစိတ်ကူး (Story Idea) နဲ့ သတင်းရင်းမြစ် (New Sources)ရှာဖွေဖို့လိုပါတယ်။
“သတင်းတစ်ခုရနိုင်ဖို့ မြို့ကိုပတ်နေစရာမလိုပါဘူး။ ပြတင်းတံခါးဖွင့်ရင် သတင်းက သင့်ခြေရင်းတွင် ရောက်ရှိနေပါတယ်”ဆိုတဲ့ ဆိုစကားလေးရှိပါတယ်။ ဒါကြောင့် သတင်းစိတ်ကူးနဲ့ ရင်းမြစ်တွေကို ဘယ်လိုရှာဖွေမလဲဆိုတာလည်း ပြောပြပါဦးမယ်။

x x x x x x x x x x x x x x x x x

Community Journalist မှသည် Professional Journalist ဆီသို့ လျှောက်လှမ်းကြရာဝယ် (၂) ဖတ်ရှုရန် *