"အီးဒ်ရဲ့အနှစ်သာရ"
မဆုံဖြစ်တာကြာတဲ့ ဆွေမျိုးတွေနဲ့ဆုံတယ်။ တစ်ခါမှမမြင်ဖူးခဲ့တဲ့ တူ တူမ ၀မ်းကွဲတွေကိုမြင်ဖူးလိုက်တယ်။ အစ်မတစ်ယောက်လိုခင်မင်ခဲ့သူတစ်ယောက် အမိမြေရဲ့အဝေးရောက်နေလို့. အဆက်သွယ်ပြတ်နေခဲ့ပေမယ့် သူက ကျွန်မအကြောင်းကို အမြဲသတိတရမေးနေတတ်တာသိလာရတယ်။ အချစ်ဆုံးသူငယ်ချင်းတွေဆုံဖြစ်ကြတယ်။ မတွေ့ဖြစ်တာကြာတဲ့ မိတ်ဆွေသူငယ်ချင်းဟောင်းတွေနဲ့ မထင်မှတ်ပဲဆုံခဲ့တယ်။ မဆုံတွေ့ဖြစ်တာကြာတဲ့ အဒေါ်ဝမ်းကွဲတွေရယ် မောင်နှမနှစ်ဝမ်းကွဲတွေဆုံပြီး ရှေးဟောင်းနှောင်းဖြစ် အသစ်တွေပြောပြီး ရီမောပျော်ရွှင်ခဲ့ရတယ်။ ရန်ကုန်မှာတုန်းက ညီမလေးကို သူငယ်ချင်းတွေနဲ့အတူ တစ်ခါလှမ်းမြင်လိုက်တယ် - ညီမလေးသွားလာလှုပ်ရှားနေတာကိုမြင်တွေ့နေတာ - မသင့်တော်တာတွေ့ရင် တိုင်ပြောဖို့အသင့်ပဲဆိုပြီး ခြိမ်းခြောက်လာတဲ့ အစ်ကိုဝမ်းကွဲတွေရဲ့ ညီမတစ်ယောက်အပေါ်ထားတဲ့ သံယောဇဉ်တွေကို တွေ့ခဲ့ရတယ်။ ဒီနေ့မြင်ရတာ မြန်မာဆန်ဆန်လေးနဲ့ ကျက်သရေရှိလိုက်တာဆိုတဲ့ စကားလေးကြောင့် ကြည်နူးခဲ့ရတယ်။ ဖုန်းဆက်ပြီး အီးဒ်မုဘာရပ်က်လုပ်ကြတဲ့ သာသနာ့မောင်နှမများနဲ့ အီးဒ်အထိမ်းအမှတ် ဆုတောင်းပေးကြတဲ့ ဘာသာခြားသူငယ်ချင်းများနဲ့ ၀မ်းသာပျော်ရွှင်စွာဖုန်းပြောခဲ့ရတယ်။ နင်တို့လာမှပဲ တွေ့ရတာပါဆိုတဲ့ လူကြီးသူမတွေစကားကြောင့် စိတ်ကျေနပ်ခဲ့တယ်။ အင်တာနက်မှာ သမီးရေးတာတွေဖတ်ရတယ် ဆက်ရေးလို့ ဦးလေးဝမ်းကွဲတွေက အားပေးအားမြှောက်ပြုကြလို့ စာရေးဖို့ပိုပြီးအားတက်ခဲ့တယ်။
ဆရာတစ်ယောက် - အဒေါ်နှစ်ယောက် - MMSY က အစ်မတစ်ယောက်ရယ် အီတီပေးဖို့ ကပ်စေးနည်းတတ်တဲ့ အစ်ကိုဝမ်းကွဲတစ်ယောက်ရယ်ဆီက အီတီတွေရလိုက်တယ်။ ကလေးတွေကို အီတီပြန်ပေးလိုက်တာကြောင့် ရတဲ့အီတီအကုန် ကုန်သွားတယ်။ အချိုတွေအဆိမ့်တွေ သိပ်မစားချင်လို့ ကြာဇံဟင်း မုန့်ဟင်းခါးကျွေးတဲ့အိမ်တွေမှာ စားတယ်။ ရောက်တဲ့အိမ်တိုင်း လက္ဘ်နဲ့အကြော်စုံကို မလွတ်တမ်းစားတယ်။ နေ့လည်ကမိုးရွာလို့ မိုးနည်းနည်းစိုသွားတယ်။ တစ်နေကုန်လျှောက်သွားထားလို့ ပင်ပန်းသွားတယ်။ ပင်ပန်းပြီး အိပ်ငိုက်လာလို့ စောစောအိပ်တော့မယ်လို့ဆုံးဖြတ်လိုက်တယ်။
အမိမြန်မာပြည် ငြိမ်းချမ်းသာယာပြီး ပြည်သူပြည်သားအချင်းချင်း စာနာ နားလည်မှုအပြည့်နဲ့ ကိုယ်ချင်းစာတရားလက်ကိုင်ထားကာ မေတ္တာတရားပွားများနိုင်ကြပါစေ . . . . . . . :-)
No comments:
Post a Comment